- Tíðindi, mentan og ítróttur
Brimskaðin í Skúvoy umvældur
<div>Ein brimskaði, sum hevur darvað havnina í Skúvoy síðstu trý árini, er nú liðugt umvældur. Sostatt skuldu umstøðurnar í bátahylinum verið í lagi aftur, skrivar Landsverk á heimasíðuni.</div><div><br></div><div>At trupulleikar hava verið og framvegis eru við atløguviðurskiftunum í Skúvoy, er ikki nakað nýtt. Tað, sum hevur gjørt viðurskiftini uppaftur verri, er ein brimskaði, sum hendi fyri stívum trimum árum síðani. Hol kom á brimgarðin til bátahylin, og holið bara vaks.</div><div><br></div><div><b>Tilfarið máað burtur</b></div><div><br></div><div>Skaðin stóðst av, at tilfarið undir brimgarðinum við tíðini varð máað burtur av stóra aldutrýstinum, serliga í vánaligum veðri. Hetta elvdi sum frá leið til, at sjógvur trongdi seg ígjøgnum rivurnar í neðra á brimgarðinum og á helluni undir honum. At enda kom rættiligt hol á verjuna, sum bara hevur vaksið seg størri og størri. </div><div><br></div><div>Nógva brimið, sum trongdi ígjøgnum verjugarðin, hevur gjørt støðuna ótolandi fyri bygdarfólkið í Skúvoy og tey, sum nýta bátahylin. </div><div><br></div><div>Skaðin skuldi havt verið umvældur í fjør, men av ymsum orsøkum bar ikki til at fáa hetta gjørt fyrr enn í ár. Tað var partafelagið J&K Petersen, sum vann lisitatiónina, og sum hevur staðið fyri umvælingini. </div><div><br></div><div>Høvuðsorkin til, at arbeiðið varð útsett til í ár, var vánaliga veðrið longu tíðliga í heyst og í vetur. </div><div><br></div><div><b>Stoypt uttan á verjugarðin</b></div><div><br></div><div>Umleið 100 rúmmetrar av betongi eru stoyptir uttan á verandi verjugarð, og nakað av helluni frammanfyri er sprongt burtur, so trýstið á verjugarðin nú er minkað. </div><div><br></div><div>Arbeiðið, sum hevur kostað 2,6 mió. krónur, er fíggjað úr landskassanum ígjøgnum eina løgtingsjáttan, sum kom eftir umbøn frá Skúvoyar Kommunu, ið eigur og varðar av havnini, skrivar Landsverk.</div>
