Granskingarráðið má hava meira pening

Føroysk gransking átti at fingið meira pening frá Granskingarráðnum. Men tað krevur, at Granskingarráðið fær meira pening, sigur granskari

Bogi Bech Jensen er lektari á Danmarks Tekniske Universitet.

Grækaris Djurhuus Magnussen

21.08.2012 - 11:10

Í staðin fyri 6 milliónir krónur átti Granskingarráðið at havt einar 30 milliónir krónur árliga. Og tann peningin kundu einstakir granskarar søkt um uttan úr heimi. Tað heldur Bogi Bech Jensen, phd. og lektari á Danmarks Tekniske Universitet. Hann hevur sjálvur gjørt nógv við at søkt pening til gransking. Fleiri tilboð fyri sama peningHerfyri segði landsstýrismaðurin í mentamálum, Bjørn Kalsø, at Fróðskaparsetrið eigur at kunna bjóða fleiri útbúgvingar fyri teir somu pengarnar. Men stutt eftir vísti rektarin á Fróðskaparsetrinum, Sigurd í Jákupsstovu, hesum aftur. - Nei, tað haldi eg ikki ber til. Fíggjarætlanin hjá Setrinum er tambað, so hon stendur at bresta. Tað ber ikki til at seta á stovn nýggj útbúgvingartilboð á Setrinum, uttan at setrið fær fleiri resursir, segði Sigurd í Jákupsstovu við Útvarpið. Lektari á DTU samdurBogi Bech Jensen, phd., og lektari á Danmarks Tekniske Universitet, er samdur við rektaran á Fróðskaparsetrinum. - Skalt tú hava meira gransking, so er neyðugt við fleiri vísindafólkum. Og fleiri vísindafólk krevur meira pening, sigur Bogi Bech Jensen. Hann vísir hinvegin á, at fleiri hættir eru at útvega pening til gransking. Søkir sjálvur um peningTað er sjálvandi møguleiki at fáa pening á fíggjarlógini. - Men, tað, sum eg geri nógv burturúr, er at søkja um pening frá tí, sum svarar til Granskingarráðið. Tann peningurin verður nýttur til vísindafólk, sum bæði standa fyri frálæru og gransking á universitetinum. Og her á deildini ella sentrinum, sum eg starvist, hevur gingið væl at fingið pening. Minni enn fjórði hvør granskari fær løn sína umvegis fíggjarlógina, restin er sett í starv av peningi, vit hava útvegað sjálvi, sigur Bogi Bech Jensen. Peningurin er annaðhvørt komin úr Danmark ella úr ES, har føroyingar eisini kunnu søkja. GóðskutrygdEin fyrimunur við at søkja um pening sjálvi er, at tað gevur eina ávísa góðskutrygd.  - Tað krevur at vit mugu skjóta upp skilagóðar ætlanir, sum aðrir serfrøðingar kanna og eftirkanna. Tað tryggjar optimala gransking allan vegin, sigur Bogi Bech Jensen. Føroyski lektarin á DTU arbeiðir við at menna el-motorar og el-generatorar. Hetta seinasta árið hevur hann einsamallur útvegað 12 milliónir krónur til gransking á sínari deild. Og møguleiki er fyri at fáa 4 milliónir aftrat í nærmastu framtíð.