- Tíðindi, mentan og ítróttur
Skuldi fáa 125.000 kr. um mánaðin í 30 mánaðir
<div>Tá teir í gamla Eik Banka síðst í september í 2010 sóu hvønn vegin, tað bar, vórðu fráfaringaravtalur gjørdar við forstjóran, Marner Jacobsen, og stjóran, Bjarna Olsen. Tað var sunnudagin 26.september í 2010. Dagin fyri, at bumban brast á tíðindafundi, at Eik var um at fara á heysin. </div><div><br></div><div>Onnur avtalan, tann hjá Bjarna Olsen, varð løgd fram í Føroya rætti í dag. Hon sigur, at Bjarni Olsen skuldi fáa løn í uppsagnartíðini, 12 mánaðir, og síðani fráfaringarløn í 18 mánaðir. Løn í 30 mánaðir. Mánaðarlønin hjá Bjarna Olsen var 125.000 kr. Omaná kemur pensjón, 18 prosent.</div><div><br></div><div><b>Eykaløn fyri at útvega kapital</b></div><div><br></div><div>Harafturat stóð í avtaluni, at Bjarni Olsen skuldi fáa nakrar mánaðarlønir, níggju varð nevnt í rættinum í dag, afturat, um hann hjálpti gamla Eik við at finna nýggjan kapital. Men hann varð kortini ongantíð biðin um at gera tað.</div><div><br></div><div>Avtalan hjá Bjarna Olsen er endað í rættinum, tí hann hevur stevnt nýggja Eik, Eik Banka Føroya, tí hann varð burturvístur 30.juni í fjør fyri grovliga at hava misrøkt sítt stjórastarv sambært kanningini, sum Carsten Fode, advokatur, gjørdi fyri Fíggjarligt støðufesti um gamla Eik.</div><div><br></div><div><b>Gamli Eik arbeiðsgevari</b></div><div><br></div><div>Hetta gjørdi, at uppsagnarlønin steðgaði tá, hóast nakrir mánaðir vóru eftir. Og fráfaringarløn bleiv eingin, tí hon skuldi byrja 1.oktober í fjør, tá uppsagnarlønin var liðug.</div><div>Bjarni Olsen hevur stevnt, tí hann heldur uppá, at nýggi Eik kundi ikki burturvísa honum. Eik Banki Føroya var ikki hansara arbeiðsgevari. Tað var gamli Eik Banki.</div><div><br></div><div>Men Eik Banki Føroya sigur afturímóti, at hann tók við øllum skyldum og rættindum hjá gamla Eik, tá gamli Eik fór undir Fíggjarligt støðufesti. Og tað var eisini Eik Banki Føroya, sum rindaði Bjarna Olsen uppsagnarlønina og aðrar sømdir, hann hevði, so sum frían bil og fría telefon.</div><div><br></div><div><b>Dómur í oktober</b></div><div><br></div><div>Dómur fellur ikki fyrr enn hálvan oktober. Hetta er bara partur av málinum. Bjarni Olsen vil eisini hava rættin at siga, at hann ikki misrøkti starv sítt sum stjóri í Eik Banka, hagar hann kom 1.mai í 1999, tá sum stjóri í Føroya Sparikassa. Marner Jacobsen, sum var forstjóri, varð eisini burturvístur. Men hann ikki stevnt. </div>
