- Tíðindi, mentan og ítróttur
Kvívíkingar vilja upp í Tórshavnar kommunu
<div>Býráðið í Havn fer á fundi í kvøld at taka støðu til eina umsókn um samanlegging, sum Kvívíkar kommuna sendi fyri meira enn einum ári síðani. Eftir at Kvívíkar kommuna hevði hildið eina vegleiðandi fólkaatkvøðu, har greiður meiriluti var millum borgarnar at leggja saman við Havnini, varð umsókn send til Havnar.</div><div><br></div><div>Men brævið úr Kvívík varð ongantíð viðgjørt. Orsøkin var, at Innlendismálaráðið kom við ætlan um at halda eina vegleiðandi fólkaatkvøðu fyri alt landið. Tann fólkaatkvøðan hevur verið, og nú skal umbønin viðgerast í býráðnum, so at Kvívíkar kommuna kann fáa eitt svar.</div><div><br></div><div><b>56 prosent fyri at leggja saman</b></div><div><br></div><div>Á vegleiðandi fólkaatkvøðuni í mai mánaði atkvøddu 56 prosent av veljarunum í Kvívík fyri samanlegging og 43 prosent atkvøddu ímóti.</div><div><br></div><div>Hinvegin var ein greiður meiriluti ímóti samanlegging millum borgarnar í Tórshavnar kommunu. Bara 23 prosent vóru fyri, meðan 65 prosent vóru ímóti meðan 12 prosent av atkvøðunum vóru blankar ella ógildugar.</div><div><br></div><div><b>Neyvan samanlegging</b></div><div><br></div><div>Heðin Mortensen borgarstjóri í Havn sigur við útvarpið, at býráðið skal hava høvið til at viðgera umsóknina, men at tað neyvan verður talan um eina samanlegging í fyrsta umfari. Men Tórshavn og Kvívík eru grannakommunur, og møguleikarnir fyri samstarvi eru nógvir, heldur borgarstjórin.</div><div><br></div><div>- Tað eigur at bera til at samstarva á fleiri økjum, hóast kommunurnar ikki verða lagdar saman, sigur Heðin Mortensen, og nevnir eitt nú sløkkilið, eldraøkið, skúlaøkið og tænastur av ymsum slag.</div><div><br></div>
