Fleiri útlendsk flogfør í Vágum

Virksemið á flogvøllinum er økt seinasta árið, og ferðafólkatalið er vaksið nærum átta prosent

Trý útlendsk flogfør hava verið í Vágum í dag í sambandi við landsdystin millum Føroyar og Svøríki, sum verður seinnapartin.

Johnsigurd Johannesen

12.10.2012 - 15:38

<p>Nógv virksemi hevur verið á flogvøllinum í dag. Umframt flogførini hjá Atlantsflogi eru trý flogfør frá øðrum flogfeløgum í Vágum, sum eru komin við ferðafólki í sambandi við landsdystin millum Føroyar og Svøríki.</p><div><br></div><div>Talan er um flogfør av slagnum Gulfstream, Metroliner og Saab, sum høvdu millum 10 og 23 ferðafólk. Jákup Sverri Kass, stjóri í Vága floghavn, sigur, at tað er eingin ivi um, at longda flogbreytin og nýggju innflúgvingartólini hava týdning.</div><div><br></div><div>- Vit vænta meiri virksemi av hesum slagi, tí umstøðurnar í Vágum eru nógv batnaðar seinasta árið, sigur hann.</div><div><br></div><div><b>Fleiri ferðafólk</b></div><div><br></div><div>Framvegis koma og fara fleiri ferðafólk um flogvøllin. Í september vóru tey sløk 18.000, og tað eru 5,3 prosent fleiri enn í september í fjør. Higartil í ár eru 175.348 ferðafólk komin og farin um flogvøllin, og tað eru sløk átta prosent fleiri enn í fjør.</div>