Allar kommunur í Suðuroy meiri í skatti

Á Tvøroyri eru tríggjar milliónir fleiri komnar í kassan í ár samanborið við somu tíð í fjør

Allir kommunukassarnir í Suðuroynni hava havt størri inntøku í ár. Á Tvøroyri eru skattainntøkurnar vaksnar við trimum milliónum kr.

Ingi Samuelsen

Johnsigurd Johannesen

04.12.2012 - 13:55

<div>Allar kommunur í Suðuroynni kunna staðfesta vøkstur í skattainntøkunum í ár.</div><div><br></div><div>Taks hevur gjørt eitt yvirlit yvir skattainntøkurnar fyrstu ellivu mánaðirnar, og tað vísir, at allar kommunurnar í Suðuroynni hava havt munandi vøkstur í skattainntøkunum.</div><div><br></div><div>Á Tvøroyri hevur skattainntøkan verið 3,1 millión krónur størri enn somu tíð í fjør. Vøksturin er til 7,2 prosent. Lutfalsliga hevur Fámjins kommuna havt størsta vøksturin. Har hevur skattainntøkan verið 13,6 prosent størri í ár, og næststørsti vøksturin er í Hovi,  12,3 prosent.</div><div><br></div><div>Í Sumba er vøksturin 6,7 prosent, Hvalba 5,2 prosent, Porkeri 3,6 prosent, og í Vágs kommuna hevur vøksturin í skattainntøkunum verið 3,1 prosent.</div><div><br></div><div><b>Afturgongd í 11 kommunum</b></div><div><br></div><div>Í 11 av teimum 30 kommununum er minni komið inn í skatti. Í Fugloy er skattainntøkan minkað 10,2 prosent, í Sands kommunu 4,2 prosent, og í Húsa kommuna hevur afturgongdin verið fýra prosent.</div><div><br></div><div>Í krónum og oyrum hevur Tórshavnar kommuna havt størsta inntøkuvøksturin. Kommunukassin í høvuðsstaðarkommununi hevur fingið 15,3 milliónir krónur fleiri í skatti í ár. Skatturin í Runavíkar kommunu er  vaksin 3,2 milliónir, og í Klaksvík og á Tvøroyri eru góðar tríggjar milliónir fleiri komnar í kassan.</div><div><br></div><div>Størsta afturgongdin hevur verið í Eysturkommunu.  Í Eysturkommunu eru 1,6 milliónir krónur færri komnar í kassan í ár. Á Sandi er skattainntøkan minkað eina hálva millión, og í Sørvági eru inntøkurnar lækkaðar umleið 300.000 krónur.</div><div><br></div><div><b>Kommunurnar meiri - landskassin minni</b></div><div><p class="MsoNormal">Kommunurnar fingu fyrstu 11 mánaðirnar í ár 32 milliónir krónur fleiri í skatti enn somu tíð í fjør, vísir uppgerðin hjá Taks. Tilsamans hava kommunurnar fingið áleið 1,3 milliardir krónur í skatti, og vøksturin er 2,53 prosent samanborið við somu tíð í fjør.</p><p class="MsoNormal">Uppgerðin hjá TAKS vísir eisini, at landskassin fyrstu 11 mánaðirnar hevur fingið 1,1 milliard krónur inn í skatti, og tað eru slakar 250 milliónir krónur færri enn somu tíð í fjør. Inntøkurnar frá eftirlønarskatti eru 193 milliónir kr., og kirkjuskatturin er vaksin 1,45 milliónir.</p></div><div><br></div><div><br></div>