Mæla frá at ferðast til Egyptalands

Tilmælið hjá danska uttanríkisráðnum umfatar tó ikki ferðafólkaøkini við reyðahavið og Aqabavíkina, skrivar uttanríkisráðið á sínari heimasíðu, www.um.dk.

50 fólk dripin

Í gjár vórðu meira enn 50 fólk dripin undir eini mótmælisgongu í høvuðsstaðnum, Kairo. Muslimska brøðrarlagið, sum hevur staðið fyri mótmælisgongunum ímóti hernaðarkvettinum móti fyrrverandi forsetanum Mursi, sigur, at trygdarfólk og løgregla lupu á, meðan egyptiski herurin sigur, at yvirgangsfólk framdu atgerðirnar móti mótmælisfólkunum, skriva reuters og ritzau.

Nógvur ófriður hevur verið í Egyptalandi síðani herurin í landinum noyddi forsetan Mohamed Mursi frá. Mursi fekk eitt ár og tríggjar dagar í sessinum sum fyrsti fólkavaldi forseti í Egyptalandi.

Nú er so greitt, at egyptarar skulu velja nýggjan forseta um áleið eitt hálvt ár. Tað sigur landsins fyribils leiðari Adli Mansour.

Nýggja grundlóg

Men fyrst skal landið hava eina nýggja grundlóg, sum skal til fólkaatkvøðu. Sagt verður, at kontroversiella grundlógin, sum fyrrverandi forsetin, Mursi, setti í verk í desember í fjør, skal broytast innan fyri næsta hálva fimta mánaðin. Og sum sagt so mælir danska Uttanríkisráðið nú øllum frá at ferðast til Egyptalands yvirhøvur - tó ikki til ferðafólkaøkini við reyðahavið og Aqabavíkina.