Snowden fær friðskjól í Venesuela

30 ára gamli avdúkarin, Edward Snowsden, er eftirlýstur í USA, tí hann sambært myndugleikunum hevur almannakunngjørt loyniligar upplýsingar.

Snowden arbeiddi í nógv ár hjá amerikonsku fregnartænastuni, National Security Agency, og í tí sambandi hevur hann greitt frá, at USA fremur miðvísa njósning á alnetinum, m.a. við teldupostum, Facebook og Google. Hetta kom fram í The Guardian og The Washington Post í juni mánað og endaði beinanvegin á forsíðunum kring heimin.

Snowden flýddi

Í mai flýddi Snowden úr USA til Hong Kong. USA hevur kravt at fáa hann útflýggjaðan, men tað hevur ikki eydnast teimum, tí eftir Hong Kong flýddi Edward Snowden til Moskva. Har hevur hann hildið til - nærum í ongamannalandi á flogvøllinum í Moskva, í eina tíð. Men nú hevur hann so fingið friðskjól í Venuzuela. Og hann hevur tikið av tilboðnum, skilst.