110.000 tons av gróti til havn á Tvøroyri

Arbeiðið at fáa grót til ífyllingina av kaihylinum, og at gera djúphavn á Tvøroyri er byrjað. Grótið verður tikið úr gamla grótbrotinum á Tvøroyri.

Í løtuni verður grivið omanav úteftir, og tá tað er gjørt, verður borað og sprongt. Nýggja djúphavnin á Tvøroyri, sum skal gerast frá vestara enda av ytstu frystigoymsluni hjá Varðanum Pelagic, vestur til endan av gomlu bryggjunii, verður 180 metrar long og 25 metrar breið.

Varðin Pelagic

Umframt at gera nýggja djúphavn, skal partur av kaihylinum fyllast út til arbeiðsøki hjá Varðanum Pelagic. Til hetta arbeiði skulu brúkast góð 110.000 tons av gróti. 285.000 tons av gróti kunnu takast í grótbrotinum.

Í fyrsta umfari verður tikið eitt sindur meiri enn tey 110.000 tonsini, sum skulu brúkast á havnarlagnum. Neyðugt er við meiri gróti til verkætlanina hjá Faroe Farming við bátahylin í Trongisvági enn tí, sum frammanundan er tikið oman fyri kirkjugarðin.

Tað er byggifelagið Articon, sum stendur fyri arbeiðinum í grótbrotinum.