ES-ósemjan: Sjúrður Skaale hótti stjórnina

Danska stjórnin stúrdi fyri meiriluta sínum í fólkatinginum, tí Sjúrður Skaale, fólkatingsmaður hjá Javnaðarflokkinum, gjørdi stjórnini greitt, at hon misti hansara stuðul, um Danmark atkvøddi fyri handilsforðingunum hjá ES móti Føroyum

Sjúrður Skaale hótti donsku stjórnina við at taka sín stuðul aftur, um danir atkvøddu fyri ES-handilsforðingunum. Her er Sjúrður Skaale saman við Mette Gjerskov.

Høgni Djurhuus

Grækaris Djurhuus Magnussen

01.08.2013 - 10:45

Danmark atkvøddi ímóti, tá ES-nevndin fyri fiskivinnu og aling í gjár tók undir við handilsforðingum móti Føroyum.

Almenna frágreiðingin hjá stjórnini er, at hon tekur stórt fyrilit fyri ríkisfelagsskapinum, og tí atkvøddi Danmark nei.

Men Mette Gjerskov, matvørumálaráðharri, váttar fyri Danmarks Radio, at hóttanin frá Sjúrði Skaale fór ikki aftur við borðinum.

- Eingin tvístøða var millum okkum og Sjúrð Skaale. Vit tosaðu saman, men hetta gjørdist ongantíð nakað stríðsmál. Vit gjørdu, sum Sjúrður Skaale mælti okkum til at gera, segði Mette Gjerskov við DR í gjár.

Sum limur í ES noyðist Danmark at vera við í boykottinum móti Føroyum. Tað noyðast hini bæði Norðurlondini í ES, Svøríki og Finnland, eisini.