Strandfaraskip landsins hevði hall í 2011

Raksturin hjá Strandferðsluni kostaði 148,4 milliónir krónur í fjør.

Strandferðslan seldi millum annað ferðaseðlar fyri góðar 58 mió. kr. í fjør.  

Oljan kostaði meira í fjør, og skaðar, leiga av eykaskipum og umbyggingin av Teistanum gjørdu eisini mun í fjør. Stovnurin noyddist at brúka hálva triðju millión av rakstrarjáttanini til at umvæla Teistan. Tað arbeiðið kostaði 20 milliónir, landið læt 17,5 milliónir til umbyggingina, so Strandfaraskip noyddust at koma við 2,5 milliónum.

Eisini í fjør var upprunaliga játtanin í fíggjarlógini ov lítil, so Strandferðslan fekk 12,3 mió. kr. í eykajáttan til olju í 2012.

Nú í 2013 er oljuprísurin steðgaður at hækka, og Strandferðslan heldur, at tær 9,8 milliónirnar, sum stovnurin fekk eyka til olju í ár, fara at røkka.  

Sambært fíggjarlógini skuldi Strandferðslan spara 4,8 milliónir í fjør.

Hetta skuldi, sambært Búskaparfrágreiðingin hjá landsstýrinum, gerast við færri túrum til Suðuroynna og Sandoynna. Strandferðslan vísti á ein annan møguleika, sum er at hækka ferðaseðlaprísin og farmaprísin.

Einki av hesum tiltøkum er enn sett í verk, er stutta niðurstøðan í ársfrágreiðingini hjá Strandfaraskipum landsins fyri 2012.