Føroysk vinna kann fáa tunnilsarbeiði

P/f Eysturoyartunnilin - Rune Bro Róin, nevndarformaður, og Jan Jakobsen, nevndarlimur - hava sent Rættarnevndini svarini skrivliga, sum nevndin fekk munnliga síðsta fríggjadag.

Talan er um 18 spurningar, sum nevndin setti.

Váði
Í tí eina svarinum verður staðfest, at felagið heldur verkætlanina vera ein váði. Og tað er tí, at felagið skal eiga tunnilin í 30 ár, ella heilt upp í hálva øld. Felagið hevur ongan trygd fyri, at tað fær sína íløgu aftur ella forrentaða, millum annað tí, at tunnilin fer at hava kapping frá vegunum millum Eysturoynna og Streymoynna.

P/f Eysturoyartunnilin hevur ikki biðið um nakra trygd fyri ferðslu í tunlinum.

Felagið hevur sett sær fyri at gera tunnilin skjótast gjørligt, so koyrandi verður í 2018.

Men tað veldst alt um, hvat forkanningarnar vísa, stendur í svarinum frá P/f Eysturoyartunlinum til Rættarnevndina.

Onki prísuppskot
P/f Eysturoyartunnilin veit ikki enn, hvussu nógv, tað fer at kosta at brúka tunnilin. Tað ber ikki til at áseta prísin fyrr enn tunnilin er gjørdur. Men kostnaðurin skal vera kappingarførur við verandi veganet, sigur felagið í svarinum til Rættarnevndina.

Vita heldur ikki tunnilsprísin
Felagið veit heldur ikki, hvussu nógv, tunnilin fer at kosta, men onnur hava sagt, at hann kostar eina góða milliard krónur.

Tað kann koma upp á tal at fáa onnur enn CIP og Lív við í fíggingina. Tað kann í vissan mun vera relevant at fáa fremmandan kapital við í P/f Eysturoyartunnilin, sum í dag hevur fimm milliónir í partapeningi, svarar felagið Rætternevndini. Lív eigur 20 prosent.