Rættarnevndin viðger tunnilsmálini aftur í dag

Løgtingsins rættarnevnd fer aftur í dag at hava fund um tunnilsuppskotini, men enn er ikki greitt, nær nevndin fer at skriva álit.

Kári P. Højgaard, landsstýrismaður, hevur sagt, at ætlanin er at skriva undir sáttmálan um Eysturoyartunnilin við Copenhagen Infrastructure Partners í seinasta lagi leygardagin.

Verður sáttmálin ikki undirskrivaður tá, noyðist landið at rinda eina millión krónur í endurgjaldi.

Fundurin í rættarnevndini í dag byrjar klokkan 14.

Eisini fundur í fíggjarnevndini

Fíggjarnevndin fer seinni í vikuni at viðgera tvey uppskot um eykajáttan, sum hava samband við tunnilsmálini.

Jørgen Niclasen hevur skotið upp at seta eina millión krónur í partafelagið Sandoyartunnilin.

Og Bjørt Samuelsen og Aksel V. Johannesen biðja um 10 milliónir kr. at seta í P.f. Føroyatunlar, ið skal byggja og reka undirsjóvartunlar millum Eysturoy og Streymoy, og millum Sandoy og Streymoy.

Fundurin í fíggjarnevndin verður fyrrapartin hósdagin.