Varð slongdur 20 metrar eftir bryggjuni

Eitt arbeiðsóhapp var á Tvøroyri í gjárkvøldið.

Tá farmaskipið Green Karmøy skuldi leggja at, slitnaði springið og trossin rakti annan mannin, sum tók móti endanum.

Slongdur 20 metrar

Maðurin varð slongdur okkurt um 20 metrar eftir bryggjuni. Kanningar á sjúkrahúsinum á Tvøroyri staðfestu, at maðurin einki brot hevur fingið, men hann hevur heilaskjálvta. Maðurin verður fluttur á Landssjúkrahúsið í dag til fleiri kanningar.

Fyrra royndin hjá Green Karmøy at leggja at lukkaðist heldur ikki væl. Skipið er stórt og tómt og nakað av vindi var. Skipið kom skeivt at bryggjuni og bar við Varðan Pelagic, har sum nakrar klædningsplátur fingu skaða.

Arbeiðseftirlitið kannar

Fólk frá Arbeiðseftirlitinum og Skipaeftirlitinum fara til Tvøroyrar í dag at kanna óhappini í gjárkvøldið.

Green Karmøy er á Tvøroyri eftir fiski frá Varðanum Pelagic.