Nú verða sáttmálasamráðingar hjá almennum starvsfólkum

Samráðingar um lønirnar hjá túsundtals fólkum, sum arbeiða hjá tí almenna, verða nú í september, tí sáttmálarnir fara úr gildi 1.oktober.

Pedagogfelagið, Lærarafelagið og Felagið føroyskir sjúkrarøktarfrøðingar eru millum størstu fakfeløg, sum hava limir á almenna arbeiðsmarknaðinum, og tey skulu samráðast um nýggjar sáttmálar nú.

Størsta felagið, Starvsmannafelagið, hevur sáttmálar heilt fram til 1.oktober í 2015.

Fáa neyvan meiri

Fíggjarmálaráðið og Kommunala arbeiðsgevarafelagið fara neyvan at geva hinum feløgunum meira hetta til 1.oktober í 2015 enn hini feløgini, sum hava sáttmála til 2015, hava fingið.

Lønardeildin hjá Fíggjarmálaráðnum hevur sáttmála ella avtalu við nøkur og tretivu fakfeløg. Nøkur feløg, sum høvdu sáttmála til 1.oktober í 2011, hava, nú næstan tvey ár eru liðin, ikki fingið nýggjar sáttmálar.