Makrelfundurin skuldi vera á ráðharrastigi

Upprunaliga ætlaði Ísland, sum hevur boðið strandarlondunum til fundar um makrel í Reykjavík í morgin og sunnudagin, at fundurin skuldi vera á politiskum stigi, tað er ráðharrafundur.Tí høvdu Føroyar einki ímóti, sigur Jacob Vestergaard, landsstýrismaður.

Men hjá øðrum lá ikki fyri. Millum annað er stórtingsval í Noregi mánadagin. Tí verður fundurin í Reykjavík millum embætisfólk og samráðingarleiðararnar hjá strandarlondunum.

Halda gongd í makrelmálinum

Grundarlagið undir fundinum í Reykjavík er eitt annað enn undir fundinum, sum var í London fyrst í vikuni, sigur landsstýrismaðurin. Endamálið við fundinum í London var at royna at byrja samráðingar um nýtt býti av norðhavssildini.

Tað er ikki endamálið við makrelfundinum í Reykjavík. Endamálið við tí fundinum er meira at halda gongd í makrelmálinum. Ísland, sum ES hóttir við handilsforðingum viðvíkjandi makreli, hevur boðið til fundar í Reykjavík.