Lærdi háskúlin í Keypmannahavn bestur í Norðurlondum

Lærdi háskúlin í Keypmannahavn, Københavns Universitet, er besta universitet í Norðurlondum.

Tað heldur QS Word University Ranking, ið hevur gjørt ein lista yvir tey bestu universitetini í heiminum. Listin varð almannakunngjørdur í dag.

Lærdi háskúlin í Keypmannahavn er nummer 45 á listanum. Lærdi háskúlin í Lund í er nummar 67, í Helsinki nummar 69, í Uppsala nr. 79, í Oslo nr. 89 og Aarhus nr. 91.

Massachusetts á odda

Besta universitet í heiminum eru Massachusetts Instute of Tecnology, MIT, meðan Harvard University, eisini í USA, er næstbest.

Síðan koma fýra universitet í Bretlandi, University of Cambridge, University College London, UCL, Imperial College London og University of Oxford.

Av teimum 17 bestu universitetunum í heiminum eru øll uttan eitt amerikansk ella bretsk. Besta universitet uttan fyri USA og Bretland er tekniska ETH universitetið í Zürich í Sveis.

QS World University Rankings brúka akademiska umdømi og granskingarúrslit sum grundarlag fyri at meta um dygdina.