Ógreitt hvør fær innlendismál

Enn er ikki greitt, hvør tekur við Innlendismálaráðnum, nú Sjálvstýrisflokkurin fór úr samgonguni í gjárkvøldið. Ein møguleiki er, at innlendismálini verða flutt einum øðrum aðalráði at umsita tað, sum eftir er av hesum valskeiðinum.

Ein annar møguleiki er, at málsøkini hjá Innlendismálaráðnum verða býtt millum nøkur aðalráð. Innlendismálaráðið umsitur løgmál, kommunumál, samferðslumál og náttúrumál.

Tíggju mál

Sambært løglistanum hjá landsstýrinum, sum løgtingið fekk ólavsøkudag, ætlar Innlendismálaráðið at leggja fram tíggju lógaruppskot í hesi tingsetuni. Tað eina er longu komið í tingið: Uppskot til løgtingslóg um broyting í løgtingslóg um einkarætt til at byggja, reka og fíggja undirsjóvartunnil undir Skálafirði og Tangafirði.

Fyribils umsitur løgmaður sjálvur innlendismálini.