SEV missir rættin til vøtnini

Tann 5.oktober eru hálvt hundrað ár liðin, síðani landsstýrið gav SEV loyvi at brúka vøtn og áir í Streymoynni, Eysturoynni, Vágum og Suðuroynni til vatnorku. Hvussu verður eftir tann dagin er ikki greitt enn. Jarðfeingi og SEV eru farin undir at fáa greiðu á tí.

Loyvið, sum SEV fekk 5.oktober í 1963, er galdandi til 5.oktober í ár.

Kunngerðin ikki longd

Petur Joensen, stjóri á Jarðfeingi, sigur, at ætlanin er ikki at leingja kunngerðina frá 1963. Men hvat kemur í staðin fyri hana, er ikki avgjørt enn. Onnur enn SEV kunnu søkja Jarðfeingi um loyvi til at brúka áir og vøtn til at gera streym.

Men eingin hevur biðið um slíkt loyvi. Sambært elveitingarlógini frá 2009 hava øll vatnorkuverkini hjá SEV nú 20 ára loyvi. Og SEV sleppur at gera vatnorkuútbyggingar, sum eru byrjaðar, lidnar, uttan at tær skulu bjóðast út.