Bøndur fáa 8,4 mió. kr. at hoyggja fyri

Í dag fer løgtingið at samtykkja, at bøndur sum sjálvir hoyggjaðu í fjør og í ár, skulu fáa tilsamans 8,4 miljónir kr. í studningi.

Teir fáa stuðulin eisini fyri 2012, hóast løgtingið ikki fyrr enn í mai í ár, broytti lógina fyri Búnaðargrunnin, so hann komandi seks árini, skal rinda 4,2 miljónir kr. til Búnaðarstovuna, sum síðani skal rinda bøndrum pengarnar sum stuðul.

Tekur undir við landsstýrinum

Fíggjarnevndin tekur undir við landsstýrinum, treytað av, at stuðulin fer beinleiðis til økta framleiðslu av føroyskum stráfóðri, sum skal gera bøndurnar meira fíggjarliga sjálvbjargnar í framtíðini.

Triðja viðgerð er av málinum á løgtingsfundinum, sum byrjar klokkan 10 fyrrapartin.