Væntar at hallið verður 150 mió. kr. størri enn mett

Løgtingið hevur samtykt, at Jørgen Niclasen, landsstýrismaður, skal svara skrivligum fyrispurningi frá Akseli V. Johannesen, formanni í Javnaðarflokkinum um skatta- og avgjaldsinntøkurnar hjá landskassanum.

Aksel V. Johannesen spyr Jørgen Niclasen, hvussu nógv skatta- og avgjaldsinntøkurnar eru hækkaðar fyrstu átta mánaðirnar í ár samanborið við í fjør, og um hallið hjá landskassanum hevur verið hægri ella lægri fyrstu sjey mánaðirnar í ár enn í fjør.

Størri hall

Aksel V. Johannesen sigur í viðmerkingunum til fyrispurningin, at alt bendir á, at hallið í landskassanum í ár verður størri enn tær 243 milliónir krónurnar, sum mett varð á fíggjarlógini.

Hann vísir á, at sambært Taks eru avgjaldsinntøkurnar hækkaðar slakar 30 milliónir, men skattainntøkurnar eru lækkaðar slaka eina millión, og við at framskriva tølini fyri alt árið sæst, at inntøkuvøksturin verður á leið 45 milliónir kr. og ikki tær ætlaðu 200 milliónirnar.

Sostatt verða landskassainntøkurnar 150 milliónir krónur færri, enn landsstýrismaðurin upprunaliga metti, sigur Aksel V. Johannesen í viðmerkingunum til fyrispurningin til Jørgen Niclasen, landsstýrismann.