Lógin broytast fyri at fáa pening til serviðgerð uttanlands

Løgtingið samtykti einmælt í gjár at lata 7,5 mió. kr. í eykajáttan til at senda fólk á sjúkrahús í øðrum londum. Men fyrst noyðist landsstýrismaðurin í heilsumálum at fáa apotekslógina broytta, so hann kann taka pengarnar av avlopinum hjá apotekunum.

Tí, sum lógin nú er orðað, skal avlopið hjá apotekunum fara í Apoteksgrunnin, ikki í landskassan.

Karsten Hansen hevur sagt, at hann kemur við uppskoti um at broyta apotekslógina.Vil løgtingið ikki broyta lógina, noyðist Heilsumálaráðið at finna pengarnar aðrastaðni.

Fíggjarnevndin hjá løgtinginum ivast tó í, at 7,5 milliónir eru nóg mikið í eykajáttan til serviðgerðir uttanlands í ár.