- Tíðindi, mentan og ítróttur
Breddin
Fyrr í dag varð løgd fram frágreiðing um støðuna í alivinnuna og hvørjar ætlanir landsstýrismaðurin í vinnumálum hevur í hyggju at fremja í vinnuni.
Frágreiðingin lýsir støðuna í alivinnuni, avbjóðingar og møguleikar, átøk, sum eru sett í verk eftir at alilógin varð broytt í 2018 - umframt framtíðarætlanir.
Endamálið við frágreiðingini er at geva Løgtinginum høvi at viðgera viðurskiftini í alivinnuni.
Tað fer løgtingið at gera í einum aðalorðaskifti mikudagin í næstu viku.
Sambært frágreiðingini ætlar landsstýrið at raðfesta tað, sum í frágreiðingini verður nevnt "offshore aling" - á føroyskum aling til havs.
Orsøkin er, sambært frágreiðingini - at samfelagsbúskaparliga avkastið av hesari alingini verður mett at hava størri menningarmøguleikar, um tað eydnast, sammett við aling á landi.
Fyri einum góðum ári síðani - hin 17. januar í fjør - var stjórin á Bakkafrost í Degi & Viku og greiddi frá teirra ætlanum um at ala laks á opnum havi.
Nú, eitt ár seinni, er henda ætlan blivin partur av alipolitikkinum hjá landsstýrinum.
Í innslagnum tosa vit við Regin Jacobsen, stjóra í Bakkafrost, um ætlanina hjá felagnum at ala laks á opnum havi.