Tvey evni eru á breddanum í dag.

Várfrágreiðing hjá Búskaparráðnum
Búskaparráðið legði várfrágreiðingina fram í dag. Í frágreiðingini stendur millum annað, at ferðavinnan í løtuni siglir í tungum sjógvi, og tí hevur brúk fyri einum hjálparpakka.

Ferðavinnufelagið mælir landsstýrinum til at longja hjálparpakka trý, sum fór úr gildi í fjør. Kemur ongin hjálparpakki til ferðavinnuna skjótt, fara onkrar ferðavinnufyritøkur væntandi av knóranum. Landsstýrið sigur seg skilja truplu støðuna, sum ferðavinnan er í, men í løtuni er eingin hjálparpakki áveg. Vit tosa við Helga Abrahamsen, landsstýrismann í vinnumálum, og Jørgen Niclasen, landsstýrismann í fíggjarmálum.

Skapandi lærugreinar
Fólkaskúlanæmingar verða í ov stóran mun eggjaðir til at velja bókligu lærugreinarnar framum tær skapandi. Orsøkin er ov lítil virðing og rúmd fyri skapandi lærugreinunum í fólkaskúlanum, sigur Henny Dánialsdóttir, ráðgevi í handaverki og list á Námi. Landsstýrismaðurin í skúlamálum vitjar í útvarpsstovuni.

Luttakarar: Heri á Rógvu, formaður í Búskaparráðnum, Jørgen Niclasen, landsstýrismaður í fíggjarmálum, Ruth Vang, forkvinna í Framsókn, Magnus Rasmussen, løgtingslimur fyri Sambandsflokkin og formaður í fíggjarnevndini, Helgi Abrahamsen, landsstýrismaður í vinnumálum, Henny á Líknargøtu, forkvinna í Ferðavinnufelagnum, Henny Dánialsdóttir, ráðgevi, Noomi í Dali, námslektari og Jenis av Rana, landsstýrismaður í skúlamálum.

Gjørt sendingina hava Jógvan Skeel Nolsøe, Krista Johnsdóttir Kreutzman, Uni Holm Johannesen og Arnfríð Joensen Dahl.