- Tíðindi, mentan og ítróttur
Breddin
Er Norðurlandaráðið bert ein kaffiklubbi við ongari ávirkan, ella er tað eitt meiningsfult samstarv tvørtur um landamark?
Vit nýta Norðurlandadagin í dag sum høvi at hyggja nærri at norðurlendska samstarvinum, og hvønn týdning tað hevur fyri okkum.
Vit tosa við Kristinu Háfoss, stjóra í Norðurlandaráðnum, Turid Christophersen, forkvinna í Norrøna felagnum, og Kaj Leo Holm Johannesen, landsstýrismann í norðurlandamálum.
Písk ella gularót
Skulu Føroyar røkka grønu málunum, sum nýggja uppskotið um veðurlagslóg leggur upp til, má ferð setast á grøna orkuskiftið.
Og tað krevur, at politikarar, vinnan og einstaklingar velja grønar loysnir í framtíðini.
Men er ein hugburðsbroyting nóg mikið til at røkka grønu málinum í 2030, ella mugu sterkari amboð, so sum avgjøld og forboð, til?
Hallbera West, ph.d. í stjórnmálafrøði, greiðir frá hvørji amboð fólkavald hava fyri at broyta atferðina hjá borgarum, og Helgi Abrahamsen, landsstýrismaður í umhvørvismálum, viðurkennir, at tað kann vera tórført at fáa allar flokkar at taka undir avgjøldum sum eitt amboð.
Val í Ísrael
Fyri fjórðu ferð síðstu tvey árini er val til ísraelska tingið, Knesset.
120 umboð skulu veljast, og enn einaferð er Benjamin Netanyahu, forsætisráðharri, høvuðspersónur í valstríðnum.
Og hann fyllir so mikið nógv, at valið í stóran mun snýr seg um, hvør styðjar Netanyahu, og hvør vil fella hann.
Vit tosa við John Rajani, sum er føroyskur sendimaður í Ísrael.
Luttakarar: Kaj Leo Holm Johannesen, Kristina Háfoss, Turid Christophersen, Helgi Abrahamsen, Hallbera West, John Rajani
Gjørt sendingina hava Heini Gaard og Hallur av Rana
Redaktørur er Hallur av Rana