Tað byrjaði á grækarismessu í fjør, tá Føroyar fóru niður í ferð. Ókenda koronusmittan loypit ótta á allan heimin, og tað skuldi berast skjótt at at steingja samfelagið.

Nú er meira enn hálvtannað ár síðani, og fleiri ferðir eru tiltøk sett í verk, sum raka gerandisdagin hjá privatfólki og vinnurekandi.

Men øll tiltøk eru sett í verk við tilmælum og ikki við lóg.

Búskapar og Løgfrøðingafelagið sigur, at hetta gongur út yvir álitið á rættarsamfelagið, sum eigur at vera skipað við lóg.

Tingmenninir, Christian Andreasen og Aksel Johannesen, sum báðir eru løgfrøðingar og advokatar, umrøða málið. Vit hoyra fólkatingsmannin, Sjúrð Skaale, greiða frá, hvussu tey í Danmark hava skipað øll tiltøk við lógm, og at enda spyrja vit løgmann, hví hann heldur fram við leistinum at seta tiltøk í verk við tilmælum, sum ikki hava nakra lógarheimild.

Í sendingini luttóku Katrin Thorsvig Hansen, Sjúrður Skaale, Bárður á Steig Nielsen, Christian Andreasen og Aksel V. Johannesen.

Sendingina gjørdu Arnfríð Joensen Dahl, Jón Brian Hvidtfeldt og John Johannesen, sum eisini var redaktørur.