Nógv umrøddi samferðslupakkin fekk í gjár sítt banahøgg frá formanninum í fíggjarnevndini, Erhardi Joensen, sum segði við útvarpið, at pakkin ikki kemur í Løgtingið, áðrenn tingið fer í summarfrí longu í morgin. Ósemja er um fleiri av pørtunum í pakkanum, og tí hevur samgongan slept at fáa hann samtyktan. Hann fellur tí burtur, tí tingsetan er av, og kann í frægasta føri vera lagdur fram aftur undir ólavsøkutingsetuni. Tað er tó ógvuliga ivasamt, um hann kemur aftur. Um so er, verður tað í øllum førum í broyttum líki í mun til tað, sum Jørgen Niclasen hevði snikkað saman, um nøkur sannlíkindi skulu vera fyri at fáa hann samtyktan.  

Síðani er Jørgen Niclasen farin frá landsstýrismaður í fíggjarmálum, og Uni Rasmussen hevur tikið við. Boðini frá nýggja landsstýrismanninum vóru beinanvegin, at hann ikki fór at koma við broytingum í pakkanum, tí tað mátti Løgtingið gera.

Nevndarviðgerðin í fíggjarnevndini hevur verið drúgv, og nevndin hevur í tveimum førum biðið um longda freist. Hóast hetta kom pakkin ongantíð úr aftur fíggjarnevndini. 

Vit rógva aftur á aftur og hyggja uppá, hvat lá í pakkanum, sum varð lagdur fyri tingið í desember. Vit hava ein eygleiðara við okkum, sum hevur eitt boð uppá, hví samferðslupakkin ikki bar á mál. Síðani hava vit nakrar politikarar í útvarpsstovuni at skifta orð um pakkan, og hví hann ikki kom aftur til viðgerðar í Løgtinginum.