Konsertin var liður í rundferð í Føroyum, Grønlandi og Íslandi.

Fleiri vilja vera við, at hetta var størsta konsert í Føroyum nakrantíð. Blur hevði júst latið úr hondum fløguna Blur, har eitt nú stórhittið Song 2 er á.

Tó vóru bara 900 áhoyrarar á konsertini á Hálsi.

Tað, sum stendur eftir hjá fleiri, er, at sangarin, Damon Albarn, drakk eina føroyska øl á pallinum og síðani segði fjøldini, at hann var alt annað enn imponeraður av smakkinum.

Finnur Koba hevur gjørt útvarpsdokumentar um forkunnugu tónleikavitjanina í 1997.

Upptøkur frá konsertini eru funnar í útvarpssavninum. Tær vórðu gjørdar til íslendskt útvarp, ið sendi beinleiðis um ISDN.

Eisini eru sjónvarpsupptøkur frá føroyatúrinum á youtube. Eitt íslendskt sjónvarpslið fylgdi Blur á konsertferðini og gjørdi samrøður við limirnar um Føroyar.

Dokumentarurin er gjørdur burtur úr konsertupptøkuni, sjónvarpsupptøkuni og samrøðum við fólk, sum upplivdu konsertina.

Sendingin snýr seg eitt sindur um bólkin, um konsertina; men eisini um føroyska samfelagið, sum júst hevði fótað sær úr bankakreppuni - og tí ikki orduliga hevði yvirskot at taka ímóti einum slíkum superbólki, ið onkursvegna tóktist vera sleptur á fjall, tá hann lendi í Vágum.

Sendingin kann hoyrast her.