Í fleiri ár hevur Eyðfinn Magnussen, lektari í lívfrøði á Setrinum, fylgt við, nær staraungarnir koma út og verða floygdir.

Í ár vórðu staraungarnir klaktir umleið 22. mai og fóru á flog 17 dagar seinri, tann 7. juni, sigur Eyðfinn Magnussen.

Tað er eitt sindur ymiskt, frá einum ári til annað, nær starin verpur, og nær ungarnir koma út.

Tey 15 árini, hann hevur fylgt við, eru ungarnir komnir út millum 12. og 28. mai. Sostatt eru tvær viku á muni.

Tað er veðrið, sum stýrir hesum.

Tá tað er kalt í veðrinum, verpur starin seinni enn vanligt.

Um tað hinvegin er lýtt í veðrinum, og útlitini fyri, at tað verður nógv at eta eru góð, tá verpur hann fyrr.

Føroyski starin verpur tvær ferðir um árið; í mai og juni.

Tað hendir seg tó, at hann verpur triðju ferð í august.

Starin verpur fimm til seks egg hvørja ferð. Eggini eru blágrøn á liti.

Starin bølir í 18 dagar, og ungarnir verða floygdir tríggjar vikur seinri.

Eftir at ungarnir eru floygdir, koma teir ikki aftur í reiðrið.

Fyrstu tveir til tríggjar dagarnar ferðast foreldrini við teimum og mata ungarnar, men fara so frá teimum og verpa uppaftur.

Eftir hetta fylkjast teir nýfloygdu staraungarnir saman í flokki og ferðast víða um í bø og haga.