Næstu mánaðirnar fer Vivian Sjóklett, sum er millum annað námsfrøðingur og sexologur, út til føroyskar fólkaskúlanæmingar at hava seksualundirvísing.

Talan er um undirvísing fyri forskúlabørnum og upp til 10. flokk.

Í smærru flokkunum snýr seksualundirvísingin seg tó ikki um sex.

- Tá handlar undirvísingin um heiti á kroppinum, um mørk, og hvør eigur kroppin, sigur Vivian Sjóklett, og vísir á týdningin av at tosa við børn um kropp, kenslur og seksualitet.

- Vit eiga at tora at svara teimum spurningunum, sum eitt barn spyr og ikki kveistra spurningin burtur, tí so taka vit barnið í álvara og kunnu hava eina siðiliga samrøðu, sigur Vivian Sjóklett.

Fyri hana er tað av stórum týdningi, at vaksin tosa við børnini um seksualitet.

- Tað er sera týdningarmikið, at eitt barn veit, hvør eigur kroppin, og at vit vaksnu tora at tosa um kroppin, tí har liggur ein rúgva av fyribyrging í tí eisini, í mun til tær keðiligu søgurnar, ið snúgva seg um ágang, sigur Vivian Sjóklett.

Í morgunsendingini greiddi Vivian Sjóklett um seksualundirvísingina, hon bjóðar seg fram at hava í fólkaskúlum kring landið.