Fáir kappróðrarbátar slíta høgan aldur. Nú á døgum verða teir ofta skiftir út eftir fáum árum. 50 ár er tí høgur aldur, sum gamli Havnarbáturin rundar í dag.

Hevði tað ikki verið fyri teir, sum róðu við Havnarbátinum í sjeytiárunum, hevði 10. mannafarið helst ikki verið til í dag. Í dag stendur Havnarbáturin trygt og væl í einari goymslu uppi á Hjalla, har gomlu rógvararnir stundum koma saman at líta aftur á gamlar dagar.

– Eg minnist, at eg slapp ikki at stýra, fyrr enn eg var lætnaður nøkur kilo, so eg mátti tuska runt og renna, greiðir Heðin Mortensen frá, sum var róðursmaður á Havnarbátinum í 1977.

Havnarbáturin hevur vunnið meira enn teir flestu. Í síni tíð var eingin annar bátur, sum vann so tíðum sum Havnarbáturin. Hann vann føroyameistaraheitið frá 1973 til 1979 og vann ólavsøkuróðurin øll árini frá 1971 til 1978. Hann vann eisini FM í 1990, 1991 og 1996. Tað varð róð við honum líka fram til 1999.

Morgunsendingin var á gátt í goymsluni, har Havnarbáturin stendur, og fekk orðið á Hannis Joensen, ið róði við bátinum í sjeytiárunum og við Heðin Mortensen, sum var formaður í Havnar Róðrarfelag hesi árini og sum eisini var róðursmaður á Havnarbátinum í eitt ár. 

Hoyr teir greiða frá.