- Tíðindi, mentan og ítróttur
Góðan morgun Føroyar
Heilsugóður og fjølbroyttur matur.
Tað er tað, sum tey í Frískúlanum á Velbastað leggja seg eftir, tá keypast skal inn til matin, sum næmingar og starvsfólk eta hvønn dag á døgurða.
Í Frískúlanum hava hvørki børn ella starvsfólk matpakka við. Hvønn fyrrapart byrja nakrir næmingar at fyrireika og gera matin, sum tey eta á døgurða. Ein leistur, sum í allar mátar riggar væl, sambært skúlaleiðaranum, Agnieszka Lach Johannesen:
- Eg leggi stóran dent á, at børnini eta sunnan mat. Tað kemur fyri, at nýggir næmingar siga seg ikki dáma okkurt, men tá teir sita við borðið saman við øðrum børnum, sum eta, so hava næmingarnir hug at royna matin. Og tað endar ofta við, at teimum dámar matin kortini, sigur Agnieszka Lach Johannesen.
Hon sigur, at tað er nógv læring í matgerð, og tí heldur hon ikki, at tíðin, børnini brúka upp á matgerð og at borðreiða, er spilltíð.
- Tað, sum tey læra seg nú, meðan tey gera mat, minnast tey altíð, so her er nógv læring, sigur Agnieszka Lach Johannesen.
Í morgunsendingini greiddu hon og tveir næmingar frá matarskipanini í Frískúlanum.