Samstarvið millum privata vinnu, gransking og tað almenna eydnaðist so mikið væl at føroyskt undirvísingartilfar fyri aðru ferð hevur fingið virðisløn.

KT-fyritøkan Tøkni, granskingargrunnurin Sjókovin og NÁM hava saman ment undirvísingarportalin sjofeingi.fo, sum bjóðar talgilt undirvísingartilfar til 6. flokkar um fiski- og alivinnu, um havið og umvørvið og mangt annað, ið er tengt at hesum vinnum.

Fyrimunurin við talgildum tilfari av hesum slag er, at tú fært tað serverað í ymiskum formatum, so sum teksti, filmum, myndum og samvirknum kortum til dømis, soleiðis at børnini ikki á sama hátt sum fyrr einans sita við einari bók, tá tey skulu læra.

Og so væl hevur eydnast við hesari verkætlan, at tilfarið hevur vunnið silvur í BELMA kappingini, sum er europeisk kapping fyri undirvísingartilfar.

Vit hoyra her Ólav Ellefsen, sum starvast á kt-fyritøkuni Tøkni, Unn Laksá er stjóri í granskingargrunninum Sjókovanum og Rannvá Hansen, sum var ritstjóri hjá Námi, tá tilfarið var framleitt.