- Tíðindi, mentan og ítróttur
Góðan morgun Føroyar
Samleikin, sum hevur verið brúktur sum innritan og talgild undirskrift síðani oktober 2020 hevur nú rundað 1 mió. avgreiðslur. Tað eru gott 33.000 fólk, ið hava Samleikan. Í miðal er hetta 33 innritanir fyri hvønn brúkara.
Samleikin kann brúkast til talgildar tænastur hjá 19 ymiskum fyritøkum, stovnum og kommunum. Um stutta tíð fara føroysku peningastovnarnir eisini at brúka Samleikan til netbankarnar.
Durita Hansen, samskiftisfólk hjá Talgildu Føroyum fegnast um, at føroyingar hava tikið Samleikan til sín. Hon roknar við, at enn fleiri fara at fáa sær samleikan, tí alsamt fleiri tænastur verða tøkar við Samleikanum. Við Samleikanum brúkar tú sama loyniorð til at rita inn á allar tænastur.
Samleikin verður mest brúktur til Vangan. Á Vanganum eru fleiri tænastur hjá kommunum og almennum stovnum, m.a. MínBoks.
Lilly Dam Hanssen, verkætlanarleiðari á Vanganum, greiðir frá arbeiðnum at menna Vangan. Fleiri tænastur fara at koma á Vangan í ár, samstundis sum at fleiri fyritøkur fara at brúka Samleikan til innritan í ár.