Hugtakið menstruatiónsfátækradømi er kanska nýtt hjá fleiri, men tað er hetta, ið liggur aftan fyri avgerðina, sum skotska tjóðartingið tók í farna mánað.

Tað leggur upp til at kvinnur hava rætt til ókeypis menstruatiónsvørur, soleiðis at tær ikki skulu hugsa um, hvørt tær hava ráð til hesar. Eisini snýr tað seg um at beina burtur tabu og stigma viðvíkjandi menstruatión yvirhøvur.

Henda mynd var at síggja á facebookvanganum hjá Skálanum - handilin á Skála

Leiðarin í handlinum Skálin á Skála helt hetta vera eitt gott hugskot og setti seg tí í samband við eigararnar við tí fyri eyga at fáa loyvi til at geva viðskiftafólkunum ókeypis bind og fekk játtandi svar. Tí ber nú til at fáa ein pakka av Rema 1000 bindum ókeypis, um tú vitjar handilin. Samstundis gjørdu eigararnir av at taka vinningin av øðrum bindum, so tey eisini vera bíligari.

- Hetta er avgjørt fyri at stimbra kjakið í Føroyum, tí vit kundu gjørt tað sama her, sigur leiðarin Jakob Lind Jakobsen.