Við árslok 2020 fóru 12 føroyskar fyritøkur undir eitt átak, ið tey nevna Burðardygt vinnulív. Endamálið við hesum felagsskapi er at menna burðardyggar mannagongdir við serligum atliti at trimum ítøkiligum avbjóðingum, nemliga veðurlagsbroytingum, heilsustøðuni í havinum og tapi av lívfrøðiligum margfeldi.

Nú tey hava verið í gongd við arbeiðið í eina tíð, er fyrsta frágreiðingin komin. Greitt er, at arbeitt hevur mest verið við fyrstu avbjóðingini - veðurlagsbroytingum, og allar fyritøkurnar kunnu vísa á úrslit, ið venda rætta veg.

bv.jpg

Men hvussu kunnu flutningsfyritøkur, framleiðarar og bankar til dømis samanberast?

- Vit hava gjørt nakrar arbeiðsbólkar, sum hava arbeitt upp á tvørs av problematikkinum, og vit hava eitt revisiónsfirma við, sum hjálpir okkum at geva virðini upp á sama hátt, tí vit eru so ymisk, sigur Jean Djurhuus, forstjóri í Betri Banka.

- Hetta hevur givið okkum eina breiða vitan um, hvussu tað sær út hjá teimum ymisku fyritøkunum, leggur hann afturat.

Nógv er at arbeiða við, og longu nú er sett út í kortið, at arbeiðast skal meira við hinum báðum økjunum næsta árið, samstundis sum arbeiðið við veðurlagstrupulleikanum heldur fram.