Nógvir føroyingar hava havt koronu seinastu tvey árini.

Men hví er tað so ymiskt, hvussu hart tey verða rakt, og hvussu leingi tey eru sjúk?

Svarið kann millum annað finnast í okkara ílegum.

- Ílegurnar serliga í sambandi við immunverjuna hava týdning fyri sjúkugongdina, eins og vit høvdu roknað við, og hetta er vitan, sum vit kunnu byggja víðari á, sigur Noomi Gregersen, verkætlanarleiðari á FarGen.

Hetta hava tey á granskingarstovninum, FarGen, kannað.

- Vit vildu vita, hví tað er so ymiskt, hvussu sjúk fólk blíva, og um ílegurnar kunnu spæla ein leiklut í hesum sambandi, sigur Noomi Gregersen, og vísir á, at slíkar kanningar eru eisini gjørdar í øðrum londum.

- Tað er áhugavert at vita, um summi biologiskt hava onkra verju, ella um summi eru meira móttakilig fyri koronu orsakað av ílegunum, sigur Noomi Gregersen.

Tilsamans 138 fólk hava verið við í kanningini, og tey vóru sjúk í fyrstu bylgju av koronu.