- Tíðindi, mentan og ítróttur
Góðan morgun Føroyar
Tað sigur Turið Horn, sum er partur av Bót til Bata, um ljósareyða oktober.
Seinnu árini hevur eisini verið vanligt at ein føroyskur sniðgevi kemur við einum prýði, sum verður selt fyri at savna pening inn til arbeiðið hjá Bót til Bata. Hesaferð er sniðgevin Johanna av Steinum.
- Eg arbeiði nógv við perlum, so tað var upplagt hjá mær at brúka tær til hesa verkætlanina eisini, sigur Johanna av Steinum.
Í januar varð avtala gjørd við toymið, sum vanliga tekur sær av framleiðsluni hjá Steinum í Ukraina, um at tær eisini skuldu framleiða ljósareyðu prýðini, men orsakað av krígnum í landinum mundi hetta farið í vaskið.
- Flestu av kvinnunum, sum arbeiða hjá okkum, flýddu undan krígnum, so tað sá svart út, men tær flestu eru tíbetur komnar heimaftur, so vit hava fingið næstan ta mongd av armbondum og oyraringum, sum vit ætlaðu at framleiða.
Eingi bróst eru eins, er ein áminning í stríðnum móti bróstkrabba. Soleiðis ljóðar eitt av slagorðunum hjá Krabbameinsfelagnum, og Turið Horn greiðir frá, tá bróstini hjá kvinnum eru so ymisk, so merkir tað, at kvinnan sjálv er hon, sum kennir síni bróst best.
- Tað er tí týdningarmikið, at vit, tá vit eru í bað, merkja eftir, um brótini kennast, sum tey plaga, ella um okkurt er, sum kennist øðrvísi. Um so er, so skalt tú leita tær læknahjálp beinan vegin.
Hagtøl siga, at bróstkrabbi rakar eina av hvørjum tíggju kvinnum í Føroyum. Bróstkrabbi rakar eisini menn, og ein av hvørjum túsund fær sjúkuna.