Tað er Náttúrunetverkið, samskipað av Umhvørvisstovuni, sum spyr okkum hesar spurningar seinnapartin, tá ið tey skipa fyri einum tiltaki í Norðurlandahúsinum. Har vera tríggjar framløgur, sum greiða frá, hvussu tú fært sum mest burtur úr tí plássi, tú hevur kring húsini.

Ein av teimum, sum fer at greiða frá, er Tjóðhild Patursson. Hon fekk heiðurin at tosa um tann mettandi urtagarðin.

- Talið á teimum, sum velta sítt egna grønmeti, veksur í heilum, og tú kanst fáa nógv burturúr, hevur tú bara eitt lítið petti av jørð, sigur hon.

Ein annar spurningur, sum fyriskipararnir hava sett, er: Hvussu nógvar gularøtur klárar tú at velta burturúr einari grasplenu?

- Svarið er í øllum førum, at tú fært fleiri, enn ein familja klárar at eta, sigur Tjóðhild.

Náttúrunetverkið, sum skipar fyri, er eitt netverk av fólkum, sum á ein ella annan hátt arbeiða við náttúruni, og áhugin er stórur, sigur Jóna Ólavsdóttir frá Umhvørvisstovuni.

- Áhugin fyri Náttúrunetverkinum hevur verið stórur, síðan vit byrjaðu, og nú hildu vit, at tíðin var komin at gera okkurt, sum var opið fyri almenninginum.

Tiltakið verður í Norðurlandahúsinum kl 19, og neyðugt er við tilmelding á nlh.fo