Klædnagávan hjálpir fíggjarliga sperdum familjum

16-11-2022

- Hetta snýr seg um at geva og vera ein góður næsti, sigur Marjun Nattestad Petersen, stigtakari til Klædnagávuna í Meinigheitshúsinum í Havn.

Troyggjur, buksur, fótbóltsgaggur, kavadraktir og vakrir kjólar.

Hetta er nakað av tí, sum er at finna í mongu eskjunum, sum standa frammi í kjallaranum í Meinigheitshúsinum í Havn.

Her hava tey tikið stig til at bjóða fíggjarliga sperdum fólkum at koma og fáa sær klæði, teimum tørvar.

Í ein góðan mánað hava tey havt opið í kjallaranum í Meinigheitshúsinum mánadagar millum klokkan 15.30 og 17.00.

- Enn hava ikki so nógv fólk verið og fingið sær klæðir, men eg hugsi, at møguliga er eisini onkur skomm tengd at hesum. Men tað ber jú eisini til at koma við klæðum og síðani býta um við eitt annað plagg, sigur Marjun Nattestad Petersen, sum er ein av stigtakarunum til Klædnagávuna.

Í morgunsendingini fortelur Marjun Nattestad Petersen um hugskotið.

Góðan morgun Føroyar

Góðan morgun Føroyar er á skránni gerandismorgnar frá klokkan 7:35 til 9:50. Sendingin loftar aktuellum evnum, hevur fastar tættir og leggur upp til interaktivitet. Alt er kryddað við tónleiki, nýggjum og eldri. Samband: gmf@kvf.fo, telefonnummar +298 347500 Góðan morgun Føroyar á Facebook (letur upp í nýggjum kaga)