Soleiðis sigur Jørn Henrik Olsen, teologur og undirvísari. Hann hevur eisini skrivað bøkur um sorg og var í Føroyum fyri kortum fyri at tosa um bíðisorg. Bíðisorg er sorgin, sum avvarandi hjá sjúkum fólkum kenna, meðan tann, tey elska, hvørvur spakuliga.

Ein tílík bíðisorg fer sera illa við fólki, tí hon drenar orku og gleði, og trupult er at fylla battaríini aftur, sum Jørn Henrik tekur til. Tí er sera umráðandi, at tú sum avvarandi bæði fært møguleika fyri at hava eitt frírúm, har tú kanst taka tær av tær sjálvari og eisini hevur onkran, sum tú kanst tosa við um hetta trupla, sum vit so fegin vilja snúgva okkum undan.

- Nógv hava trupult at tosa um hesi tingini, sum eru svár, so eg vil viðmæla øllum, sum ganga við slíkum at finna onkran, sum tey hitta javnan til ein gongutúr ella ein kaffimunn og eitt gott prát um júst hesi ting, sum níva.