Ungdómstoymið hjá Sinnisbata, Sinnisbati Ung, hevur í seinastuni undirvíst 7.-9. flokkum í sálarheilsu. Hesum fara tey at halda fram við eftir páskir. 

Anna Joensen-Næs og Sólrún Sundberg Michelsen vóna, at tær við hesum varpa ljós á, at tað er í lagi at tosa um sínar kenslur, eisini tá ið mann ikki hevur tað gott.

Á skránni er nógv ymisk; spøl, persónligar søgur og prát um sálarheilsu.

- Summi halda, at tað er torført at vera við, men sum heild, lata tey ungu væl at hesum, siga tær báðar.

Eisini leggja tær dent á, at slík undirvísing hevur manglað, tá ið tær vóru yngri.

- Tað skal vera eins líka nógv fokus á ta sálarligu heilsuna, sum ta kropsligu, halda tær.