- Tíðindi, mentan og ítróttur
Góðan morgun Føroyar
![](https://kvf.fo/sites/default/files/styles/podcastmyndir/public/gmf_1920x1080.png?itok=JOyOqNdL)
Tað ørkymlar, nú vit fáa boð á Messenger og umvegis teldupost um, at Meta ella Facebook vil hava okkum til at broyta loyniorð ella tøppa inn kortupplýsingar til dømis. Tað ørkymlar meira enn tað plagdi, tí boðini nú eru á føroyskum. Tað plagdi at vera lættari at skyna á nær boðini vóru følsk, tí tey vóru á donsum ella enskum.
- Tað er eitt vandatekin, tá tú fært eini boð frá einum sosialum miðli á føroyskum, tí tey fara ikki at venda sær til okkum á føroyskum. Tað hava tey als ikki fólk til. Eru boðini føroysk, er tað sanlíkt vitlíki, sum hevur umsett, sigur Jákup Brúsá, serfrøðingur í sosialum miðlum.
Hann hevur tvey góð ráð til tín, sum ivast í, um boð eru ektað ella følsk:
1. Meta fer ongantíð at senda tær boð umvegis messenger, og tey frámerkja teg heldur ongantíð í einum uppslagi av nøkrum slag. Tey senda altíð teldupost.
2. Fært tú ein teldupost sum sær út til at koma frá Meta, Netflix ella øðrum, sum kunnu hugsast at senda tær boð, kanna teldupostadressuna, sum hevur sent tær boðini. Hetta kann gerast við at trýsta á navnið á avsendaranum. So sært tú, um tað samsvarar.
Dømi: Facebook nýtir bert hesi økisnøvn: @fb.com, @facebook.com, @facebookmail.com.
Tað sama er galdandi við øðrum avsendarum, sum tú kanst vænta at fáa boð frá. Er tað ein veruligur teldupostur, er tað ikki frá nøkrum einstøkum persóni ella einari teldupostadressu sum sigur nakað annað.
![](https://kvf.fo/sites/default/files/styles/news_xtra_xtra_large_2/public/gmf_1920x1080.png?itok=gibwahtF)