- Tíðindi, mentan og ítróttur
Góðan morgun Føroyar
Nærvera og tíð.
Hesi eru lyklaorðini, tá tð snýr seg um at gera desember til ein barnavinarligan mánað, heldur Sára Gullfoss, heilsufrøðingur í Gigni.
Fyri flestu familjur er desember eitt tíðarskeið við nógvum tiltøkum, jólaveitslum, sangløtum, jólagávuinnkeypi og nógvum afturat. Tí kann mánaðurin lættliga blíva strævin fyri bæði børn og vaksin.
- Vit skulu minnast til, at umframt alt hetta, sum verður væntað av okkum í desember, so er ein vanligur gerandisdagur eisini við øllum tíð, sum hann nú einaferð inniheldur. Familjan skal upp um morgnarnar, út um hurðina, á dagstovn, í skúla, til arbeiðis og síðani frítíðarítriv og so framvegis, sigur Sára Gullfoss.
Sambært henni er umráðandi, at foreldur velja og velja frá, tá tað snýr seg um tiltøk í desember
- Eg haldi, at tað er umráðandi, at vit ikki fara til alt, sum nú einaferð er í jólamánaðinum. Sum foreldur kenna tit barnið best, og merkja tit, at nú hevur tað verið í so rokaligt hjá børnum og vaksnum, jamen latið so vera við at fara til onkra jólaveitslu ella okkurt tiltak. Verið í staðin bara saman heima við hús og slappið av, sigur Sára Gullfoss.
Í morgunsendingini gevur Sára Gullfoss góð ráð til barnafamiljurnar í desember.