Tú kanst ikki fara í hvat sum helst, tá tú skalt standa á tingsins røðarapalli, tí í løgtinginum er klædnakrav galdandi.

- Klæðini skulu vera siðilig og tignaðarlig, sigur Bjørt Samuelsen, tingforkvinna.

Herfyri stóð løgtingslimurin, Jørgen Niclasen, á tingsins røðarapalli í eini heimabundnari skipstroyggju.

Jørgen Niclasen legði mynd út á sín Facebook-vanga av hesum, men tað vísti seg, at tað vóru tey, sum høvdu hug at havast at, at hann var í heimabundnari troyggju og ikki skjúrtu, slipsi og jakka.

- Fyri meg er tað minst líka so virðiligt at vera í føroyskari, heimabundnari troyggju sum í einum útlendskum klædningi, sigur Jørgen Niclasen.

Í morgunsendingini tosa Bjørt Samuelsen og Jørgen Niclasen um klædnakrav og rættar siðareglur í løgtinginum.