Hjólvelting í Havn í kvøld

12-05-2016

Eitt serligt súkklutiltak verður í Havn í kvøld, har fólk fara at súkkla kring býin, hugna sær og njóta løtuna

Tað eru Føroya Náttúru- og Umhvørvisfelag og Tórshavnar Súkklufelag, sum saman við Tórshavnar kommunu skipa fyri tiltakinum. Hugskotið er at savna so nógvar súkklur sum gjørligt, og síðani dølla seg runt gjøgnum býin, sum Napoleon Smith, fyriskipari, tók til í sendingini Góðan morgun Føroyar.
Íblásturin til hjólveltingina, sum tiltakið rópast, stavar frá franska hugtakinum La vélorution, sum er eitt orðaspæl millum velo, sum merkir súkkla, og révolution, sum merkir kollvelting. Talan er um eina rørslu, sum eggjar fólki til at brúka bleytu ferðsluhættirnar og at fremja sosialar og grønar broytingar í samfelagnum.

Le vélorution hevur Napoleon Smith umsett til hjólvelting - og tað verður á skránni í Havn í kvøld. Byrjað verður á Vaglinum klokkan sjey.

Mynd: Napoleon Smith hevur teknað

Góðan morgun Føroyar

Góðan morgun Føroyar er á skránni gerandismorgnar frá klokkan 7:35 til 9:50. Sendingin loftar aktuellum evnum, hevur fastar tættir og leggur upp til interaktivitet. Alt er kryddað við tónleiki, nýggjum og eldri. Samband: gmf@kvf.fo, telefonnummar +298 347500 Góðan morgun Føroyar á Facebook (letur upp í nýggjum kaga)