Pál Joensen millum favorittarnar í Barcelona

Sambært heimasíðuni svimjing.com skrivar svimjiserfrøðingurin, John Lohn, at Sun Yang er greiður favorittur til gullið í báðum greinum, meðan Ryan Cochrane, Connor Jaeger, Gergo Kis, Gregorio Patrinieri og Pál Joensen fara at kappast um hini heiðursmerkini í 800 frí. Og hann væntar, at Ryan Cochrane, Connor Jaeger, Oussama Mellouli, Gergo Kis, Pál Joensen og Jordan Harrison fara at kappast um gullið í 1500 frí.

Á svimjing.com verður hetta sagt at vera rættiliga merkisvert, tí at Pál ikki hevur svomið nakra serliga sterka tíð í hesum greinum á langgeil, hetta seinasta árið.

Pál Joensen skal svimja innleiðandi kappingina í 800 metrum týsdagin 30. juli, og sjálv finalan verður dagin eftir. Og leygardagin 3. august verður so innleiðandi svimjingin á 1.500 metrum.

Góðar venjingarumstøður
Rókur í Jákupsstovu, næstformaður í Svimjisambandinum, og viðmerkjari, sigur, at hann hevur onga hóming av, hvussu tað kemur at ganga. Hann vísir á heimasíðuni, svimjing.com, á, at umstøðurnar hjá Páli eru heilt øðrvísi. Nýtt land, nýggir venjarar og munandi betri venjingarumstøður.

Sambært in.fo krossar fyrrverandi venjarin hjá Páli Joensen fingrar fyri, at Pál Joensen finnur stevið aftur í Barcelona.

- Eg vóni, at hann svimur eins frítt og hann gjørdi í 2008 og 2011, tá trýstið ikki var so stórt á honum, sigur Jón Bjarnason, sambært in.fo.