Fleiri í tænastuvinnuni og færri í byggivinnuni

Fleiri starvast í privatu tænastuvinnuni, men færri eru í byggivinnuni.

Tað vísa nýggj hagtøl frá Hagstovuni.

Í juli vóru tilsamans 8.221 løntakarar í privatu tænastuvinnununi. Tað eru 118 fleiri enn sama mánað í fjør. Framgongdin er hálvt annað prosent. Í byggivinnuni og tilvirkisvinnuni vóru 3.098 løntakarar í juli. Tað eru 56 færri enn sama mánað í fjør, og afturgongdin er 1,8 prosent.

8.900 í almennum starvi

Løntakararnir í bólkinum, sum eitur Almenn og onnur tænasta, eru tilsamans 8.891, 91 færri enn í juli í fjør. Hinvegin eru 27 fleiri løntakarar skrásettir í bólkinum, sum eitur Fiski-, ali- og ráevnisvinna, ella tilsamans 4.111.

Í juli vóru tilsamans 24.421 løntakarar skrásettir, tveir færri enn í juli í fjør. Men árstíðarjavnað vóru 23.710 løntakarar í juli samanborið við teir tríggjar mánaðirnar frammanundan, tá tað vóru umleið 23.650 løntakarar hvønn mánað, sigur Hagstovan.