Umlættingardepilin skal verða liðugur í 2016

Gongst sum ætlað, verður ein virknis- og umlættingardepil til børn og ung við serligum avbjóðingum tikin í nýtslu í Sandoynni í 2016.

Annika Olsen, landsstýriskvinna, hevur biðið løgtingið um heimild at byggja depilin, og útreiðslurnar til verkætlanina kunnu í mesta lagi vera 12,4 milliónir kr.

15 fólk

Ætlanin er, at virknis- og umlættingardepilin skal vera karmur um virksemið hjá Stuðulsfólkaskipanini fyri børn í Sandoynni og eitt landsfevnandi tilboð um umlætting. Á deplinum vera átta umlættingarrúm, t.e. kømur við egnum baðirúmi, og felagshøli til ymisk tilboð fyri umleið 15 fólkum.

Umlættingarrúmini kunnu nýtast til børn og ung úr øllum landinum, og verður tørvur á tí, kunnu fýra umlættingarpláss skipast til varandibúpláss seinni. Almannaverkið sigur, at í løtuni eru 4-6 børn í Sandoynni, sum fáa tilboð frá Stuðulsfólkaskipanini.

Fyribils byggiskrá

Ætlanin, sum fyriliggur, byggir á eitt tilmæli frá eini bygginevnd, sum hevur gjørt eina fyribils byggiskrá. Hon verður endaliga viðgjørd, tá tað er greitt, hvar í Sandoynni depilin skal byggjast, sigur Annika Olsen í viðmerkingunum til lógaruppskotið.

Málið kemur til viðgerðar í tinginum eftir heystfrítíðina.