Føroysk WTO-kæra: Óvanligt at Danmark hjálpir

Hetta er ein heilt óvanlig støða, tí Danmark hevur ikki áður brúkt limaskap sín í WTO, heimshandilsstovninum, til at kæra.

Tað sigur Lars Bracht Andersen, lektari og serfrøðingur í WTO-rætti á universitetinum í Århus, við Politiken. Danmark hevur givið Føroyum fulltrú til at kæra ES fyri WTO, tí ES hevur sett í gildi handilsforðingar móti Føroyum. Føroyar eru ikki sjálvstøðugur limur í WTO, so tí noyðast Føroyar at spyrja Danmark, um Føroyar kunnu kæra.

Ikki brúkt limaskapin á henda hátt

Danska uttanríkisráðið hevur avgjørt at geva Føroyum fulltrú. Hetta er heilt óvanligt, sigur Lars Bracht Andersen við Politiken. Danmark hevur ongantíð fyrr brúkt limaskap sín í WTO á hendan hátt. Harafturat er Danmark limur í ES, sum Føroyar ætla at kæra.

Men danska stjórnin fær ikki gjørt annað, tí annars viðurkennir stjórnin ikki, at partar av ríkinum, Føroyar og Grønland, ikki eru við í ES, sigur Lars Bracht Andersen. Í august fingu Føroyar fulltrú frá Danmark til at fara í altjóða gerðarrætt við ES. Men at kæra ES fyri WTO er nógv meira "spektakulert", sigur Lars Bracht Andersen við Politiken.